باحثین علوم اسلامیہ کا تعارف

باحثین علوم اسلامیہ فیڈرل گورنمنٹ آف پاکستان سے ”انسٹی ٹیوٹ آف باحثین علوم اسلامیہ“کے طور پر رجسٹرڈ ایک تعلیمی اور تحقیقی ادارہ ہے  جو علوم اسلامیہ  میں جاری تحقیقات کی تدوین اور تنظیم کا کام کرتا ہے اور اپنے تمام ریکارڈز کو ادارے کی ویب سائٹ باحثین ڈاٹ کام  (BAHISEEN.COM)کے توسط سے آن لائن استفادے کے لیے پیش کرتا ہے۔

باحثین علوم اسلامیہ  سے منسلک اسکالرز دنیا بھر سے تعلق رکھتے ہیں۔ علمی اور تحقیقی سرگرمیوں میں ہمارے ساتھ  تعاون کرنے والے افراد دنیا بھر سے  خاص طور پر پاکستان، ہندوستان، مصر، سعودی عرب اور مصر سے تعلق رکھتے ہیں۔  باحثین علوم اسلامیہ کا ادارہ علوم اسلامیہ  میں جاری تحقیقات کی تدوین اور تنظیم کرنے کے بعد افادۂ عام کے لیے آن لائن  ویب سائٹ پر  پیش کرتا ہے جس میں آئی ٹی پروفیشنلز کی ٹیم  تعاون کرتی ہے اور ادارے کی ویب سائٹ کو آن لائن رکھنے میں معاونت کرتی ہے۔ ادارے کے ریکارڈز اگرچہ آن لائن  پیش کیے جاتے ہیں مگراس کا صدر دفتر  ضلع بہاول پور کے قصبہ قائم پور میں واقع ہے جہاں ان تمام سلسلوں کا ریکارڈ رکھا جاتا ہے۔

باحثین علوم اسلامیہ کی تاریخ

باحثین علوم اسلامیہ کا آغاز 2013ء میں ہوا اور ابتداء میں بلاگ سپاٹ پر باحثین کے نام سے بلاگ بنایا گیا۔ سن2015ء میں ہمارا تمام  مواد بلاگ سپاٹ سے  ورڈ پریس  کی ڈومین پر بلاگ  کی صورت میں منتقل ہوا۔  اس عرصے میں اس سے استفادہ کرنے والوں کی تعداد محدود تھی اور یہ سلسلہ بھی محدود تھا اور انفرادی ریکارڈز کی شکل میں تھا۔ اس عرصے میں بہت سی دشواریاں تھیں۔  ورڈ پریس بلاگ کی محدود سہولیات کی وجہ سے تمام مواد آن لائن نہیں تھا۔ جن احباب کو ان ریکارڈز سے متعلق معلوم تھا وہ اس کے حصول کے لیے بہت مشقت اٹھاتے تھے۔ اسی دوران مواد کی فراہمی کی فرمائشیں   پے درپے موصول ہونے لگیں، شائقین مواد کے حصول کے لیے  دوردراز سے  سفر کی مشقتیں اٹھانے کو تیار ہوتے تھے۔ ا ن حالات کے پیش نظر یہ احساس پختہ ہوتا گیا کہ اس سلسلے کو منظم انداز سے   آن لائن پیش کرنا از حد ضروری  ہے۔

چنانچہ اس سلسلے کو منظم کرکے معیاری انداز سے ٹاپ لیول ڈومین پر منتقل کرنے کا منصوبہ بنایاگیا۔   سن 2016ء کے اواخر  میں اس منصوبے پر کام شروع کیا گیا  جو تقریباً دو سال  کے عرصےمیں تکمیل کو پہنچا ۔ جنوری2019ء میں اس سلسلے کو  ایک منظم ادارے کا نام دے کر سابقہ مواد میں بے شمار اضافے اور تصحیحات  کے بعد ادارے کی ویب سائٹ BAHISEEN.COM  پر منتقل کردیا گیا ۔

اللہ تعالیٰ کے فضل و کرم سے جنوری 2019ء میں  جب یہ سلسلہ آن لائن ہوا تو یہ ابتدائی ورژن تھا۔ اس کے بعد اس پر مستقل کام جاری رہا۔ کچھ منصوبے 2019ء سے 2020ء کے درمیانی عرصے میں مکمل ہوئے   جب کہ  کچھ منصوبے 2021ء میں شروع ہوں گے۔ 2019ء سے 2020ء تک کے عرصے میں  ادارے نے تمام قسم کے نشیب و فراز دیکھے ۔  صارفین کی طرف سے ہزاروں کی تعداد میں تہنیتی پیغامات موصول ہوئے، اتنی ہی دعائیں ملیں اور  جن لوگوں نے استفادہ کیا انہوں نے ادارے کی ترقی اور نیک نامی کے لیے خواہشات کا اظہار کیا۔ ٹیکنیکل ٹیم جو ابتداء سے تاحال ہمارے ساتھ مسلسل تعاون کررہی ہےان کی محنت اور لگن کی وجہ سے ان کی پشت پر ہمارے صارفین ہی کے حوصلہ بھرے پیغامات  اور دعائیں ہیں جن کی وجہ سے ہماری ٹیکنیکل ٹیم کو دلی اطمینان ملا اور انہوں نے مزید دلجمعی اور لگن سے کام کیا۔

رسول اللہﷺ کا فرمان ہے :

عَنْ أَنَسٍ، أَنَّ الْمُهَاجِرِينَ، قَالُوا: يَا رَسُولَ اللَّهِ ذَهَبَتِ الْأَنْصَارُ بِالْأَجْرِ كُلِّهِ قَالَ: «لَا مَا دَعَوْتُمُ اللَّهَ لَهُمْ وَأَثْنَيْتُمْ عَلَيْهِمْ»(سنن ابی داؤد)

یعنی کسی کی بھلائی کے بدلے میں دعا اور تحسین کرنے والا بھی ثواب سے محروم نہیں رہتا۔ ہم سمجھتے ہیں کہ ہمارے صارفین میں  سے تہنیتی پیغامات بھیجنے والے، حوصلہ بڑھانے والے اور  دعا دینے والے احباب کا  بھی نیکی کے اس کام میں بھرپور حصہ ہے۔  اللہ تعالی ہماری کاوشوں کو قبولیت عطا فرمائے اور ہمیں صراط مستقیم کی ہدایت نصیب فرمائے۔

باحثین علوم اسلامیہ کے اغراض و مقاصد

بطور ادارہ باحثین علوم اسلامیہ کی سرگرمیوں کا محور علوم اسلامیہ کی تحقیقات ہیں۔ ان تحقیقات کا ریکارڈ رکھنا اور اسے آن لائن فراہم کرنا ۔ تحقیق کاروں کے لیے تکنیکی معاونت اور ریسرچ کے جدید ذرائع تک رسائی، پیشکش کی ماڈرن تکنیکس، جدید سافٹ وئیرز اور ٹولز  کی فراہمی اور ان سے متعلق تکنیکی راہنمائی فراہم کرنا ہمارے بنیادی مقاصد میں شامل ہے۔ اس ضمن میں ہمارے ادارے میں درج ذیل سرگرمیاں سال بھر جاری رہتی ہیں :

علوم اسلامیہ کے بنیادی مآخذ و مصادر تک رسائی کو سہل و ممکن بنانا۔

علوم اسلامیہ کے تمام جدید ریسورسز تک رسائی کو سہل و ممکن بنانا۔

علوم اسلامیہ میں جاری تحقیقات کی فہارس تیار کرکے آن لائن پیش کرنا۔

دنیا بھر میں موجود اسلامی مخطوطات کے ریکارڈ تک رسائی کو سہل اور ممکن بنانا۔

علوم اسلامیہ کے مجلات اور تحقیقی مضامین کے ذخائر تک رسائی کو یقینی بنانا۔

اسلامی کتب کے منتشر ذخائر کو منظم کرکے پیش کرنا تاکہ تحقیق کاروں سے کوئی کتاب اوجھل نہ رہے۔

لائبریریز اور اسلامک ریسرچ انسٹی ٹیوٹس کا جامع تعارف پیش کرنااور آن لائن کیٹلاگز تک رسائی کو ممکن بنانا۔

علوم اسلامیہ کی تحقیقی سرگرمیوں، خاص طور پر کانفرنسز، ورک شاپ اور سیمینارز کی اطلاعات کی ترسیل۔

علوم اسلامیہ کی ذیلی شاخوں پر اختصاصی مہارت رکھنے والے اسکالرز کا جامع تعارف ۔

ریسرچ ٹولز اور سافٹ وئیرز کی اعلی سطحی تکنیکی معاونت فراہم کرنا۔

پی ڈی ایف اور مائیکروسافٹ آفس کی ایڈوانسڈ لیول کی مہارتوں کو عام تحقیق کاروں تک پہنچانا۔

ڈیجیٹل لغات اور علوم اسلامیہ کے ڈیٹا بیس سافٹ وئیرز سے متعلق ٹریننگ دینا۔

تحقیقی عمل کے لیے درکار تکنیکی معاونات کی آن لائن پیش کش۔

تمام سہولیات کو آن لائن فراہم کرنا تاکہ دنیا بھر سے لوگ استفادہ کرسکیں۔

باحثین علوم اسلامیہ ، حدود اور دائرہ کار، ضروری وضاحتیں

باحثین علوم اسلامیہ صرف اسی جہت پر کام کرتے ہیں جو بالواسطہ یا بلاواسطہ علوم اسلامیہ سے متعلق ہویا علوم اسلامیہ میں جاری تحقیقات یا محققین کو اس کا فائدہ ہوسکتا ہو۔  دیگر جہات پر حتی الامکان کام نہیں کیا جاتا۔ خاص طور پر سافٹ وئیرز سے متعلق وہ بنیادی باتیں جو عام طور پر لوگوں کو معلوم ہوتی ہیں ہم انہیں نہیں دہراتے۔  ہم کوشش کرتے ہیں کہ صارفین دیگر چینلز سے وہ معلومات خود حاصل کرلیں۔  وہ سافٹ وئیرز یا ٹولز جو اس شعبے میں رائج نہیں ہیں خواہ وہ ٹائپوگرافی سے متعلق ہی ہوں ، ہم ان سے متعلق بھی کوئی راہ نمائی فراہم نہیں کرتے۔

باحثین علوم اسلامیہ تحقیقی سرگرمیوں کے ساتھ کچھ خدمات مثلاً ٹائپنگ، پروف ریڈنگ اور ترجمے کی سہولت فراہم کرتے ہیں مگر مقالہ لکھنے سے متعلق کسی قسم کی کوئی سرگرمی ہمارے ہاں نہیں ہوتی۔  نیز مقالہ لکھ کر دینے کی کسی بھی درخواست کو زیرِ غور نہیں لایا جاتا۔

کتب، کیٹلاگز، مخطوطات کے ذخائر سے متعلق فراہم کیے جانے والے ریکارڈز اصل ویب سائٹ سے صارفین تک براہ رست پہنچتے ہیں ۔ اس لیے ہم کسی بھی ریکارڈ کی دستیابی یا عدم دستیابی کی ذمہ داری نہیں لیتے۔ یعنی اگر کوئی ریکارڈ کسی ویب سائٹ پر موجود ہے  اور ہماری ویب سائٹ پر نظر آرہا ہے تو ہم اس کی ذمہ داری نہیں لے سکتے کہ وہ ہماری ویب سائٹ پر کیوں نظر آیا ہے۔ نیز اگر کوئی کتاب یا ریکارڈ اصل ویب سائٹ سے ختم کردیا گیا ہے  تو یقینی طور پر ہماری ویب سائٹ بھی اسے دکھانے سے قاصر ہوگی۔ ان ریکارڈز کے سلسلے میں ہماری حیثیت محض ایک سہولت کار کی ہے۔

اشتہارات سے متعلق بھی واضح کیا جارہا ہے کہ اشتہارات پر ادارے کا کنٹرول نہیں ہوتا اس لیے ہم اس سلسلے میں معذرت خواہ ہیں۔ نیز صارفین اشتہارات کے بغیر ویب سائٹ دیکھنے کے لیے  پریمیم ممبرشپ اکاؤنٹ لے سکتے ہیں جس میں لاگ ان ہوکر  اشتہارات نظر نہیں آئیں گے۔

ادارے کی ویب سائٹ دعوتی  نقطہ نظر سے نہیں بنائی گئی۔ یہاں تعلیم یافتہ اور اسلامی تعلیمات  پر خاصی دست رس اور عبور رکھنے والے  صارفین آتے ہیں۔یہاں آنے والے اکثروبیشتر صارفین کم از کم 16 سال اسلامی علوم کے ساتھ وابستگی میں گزار چکے ہوتے ہیں۔ اس لیے یہاں موجود ریکارڈ ز میں کسی بھی مسلک ، مذہب، فرقے یا فتنے کی کتب یا ان کی حمایت  یا رد میں کتب موجود ہوسکتی ہیں ۔  لہٰذا اس سلسلے پرکسی اعتراض کو جگہ نہیں دی جاتی۔